油漆味几耐先散？翻油后几时可以入住？师傅话你知

油漆「干」有两个阶段

好多人以为手摸唔黐手就系干，其实油漆有两个阶段：表干（约 1-2 小时，表面结膜）同实干（乳胶漆约 5-7 日，漆膜完全硬化）。表干后可以轻触，但实干前唔好用力抹洗或者靠家私贴墙。

油漆味几耐先散？

用环保净味乳胶漆嘅话，正常通风下 1-3 日气味已经好淡，一星期内基本闻唔到。如果用咗传统油性漆（磁漆、手扫漆），气味可能维持两至四星期。所以油漆师全屋翻新一律建议用环保净味乳胶漆。

几时可以入住？

• 一般成人：完工后通风 2-3 日已经可以入住
• 有 BB、孕妇、长者或者哮喘人士：建议通风 7 日或以上，并拣低 VOC、获环保认证嘅油漆
• 宠物：雀仔对气味特别敏感，建议两星期后先返屋企

加快散味五个方法

• 对流通风：开晒全屋窗，用风扇对住窗外吹，加快空气交换
• 抽湿机：降低湿度可以加快漆膜实干
• 活性炭包：摆喺角落同柜入面吸附气味
• 清水加白醋：碟装摆喺房中间，帮助中和气味
• 避免即刻闩窗开冷气：气味会困喺室内散唔走

闻到刺鼻味好耐都唔散？

如果翻油后几个星期仍然有强烈刺鼻味，可能系用咗劣质油漆或者天拿水开稀过度。油漆师只用正货环保漆，开工前会话你知用咩牌子型号，单据透明。